Gaur arratasaldean hasiko da Lekeition, 2012ko Nazioarteko Kale Antzerki Jaialdia. Danetara, hamaika talde arituko dira gaur hasi eta domekara arte entretenimendua eskaintzen. Euskal Herriko sei talde egongo dira: Gaitzerdi, Hortzmuga, Salitre eta Matrioska talde profesionalak, eta bestetik, Lekeitioko bi ekoizpen propio, Karkabia eta Lekittoko Deabruak. Bestalde, Frantziatik etorriko da Luc Amoros taldea Page Blanche arte-lan ikusgarriagaz, Uruguaytik dator D’Ailleurs taldea eta Kataluniatik bi ordezkari: Industrial Teatreraren asmamen zorrotza, eta Trifaldo konpainiaren zirku berria. Amaitzeko Gaztela aldetik dator Zanguango taldea, errealitatea eta fikzioa nahasteko duen trebetasuna erakusteko. Atzo aurkeztu zuten jaialdia Lekeition Imanol Agirre jaialdiaren zuzendari artistikoak eta Gorka Rodriguez Lekittoko Deabruak taldeko kideak. Bestalde, domekan, jaialdiagaz bat egingo duen kataluniako herri tradizioko Castellerrak egongo dira 14:00etan, plazan. Egitaraua: BARIKUA 19:30ean, plazan. HORTZMUGA [...]

Lekeition batuko dira antzerkizaleak uztailaren lehen asteburuan, orduantxe ospatuko da eta Euskal Herrian aitzindaria den Nazioarteko Kale Antzerki Jaialdia. Aurten 23 urte betetzen dituen jaiak, uztailaren 6an, 7an eta 8an eskainiko ditu emanaldiak. Beti be, euskal antzerkiaren alde egin dute antolatzaileek nazioarteko jaialdia martxan jarri zutenetik, eta aurten, oraindik ozenago aldarrikatuko dituzte bertoko arte-ekoizpenak. Horrela, sei euskal estreinaldi egongo dira Lekeitioko plazan , eta horietako bi, gainera, Lekeition bertan sortuak. Horretaz gainera, nazioarteko maila be zaindu dute, eta Frantzia, Uruguay, Herrialde Katalanak eta Gaztela gonbidatu dituzte. “Munduan dauden sormen-lan ez ohiko eta barriak”, esan dute XUT taldekoek.